Хөдөлмөр, нийгмийн хамгааллын яам нь Leaders Advancing Democracy – LEAD Mongolia US20 хөтөлбөрийн “Ил тод байдлыг сайжруулах, авилгыг бууруулах” бодлогын багтай хамтран хэрэгжүүлж буй “Бидэнд Ойр”-хөгжлийн бэрхшээлтэй хүүхдүүдэд үзүүлэх эрүүл мэндийн үйлчилгээний хүртээмжийг сайжруулах төслийг хэрэгжүүлж эхэллээ. Төслийн хүрээнд хөдөө орон нутаг алслагдсан сум дүүрэгт байгаа хөгжлийн бэрхшээлтэй хүүхдүүд Улаанбаатар дахь Хөгжлийн бэрхшээлтэй хүүхдийн сэргээн засах хөгжлийн төврүү eclinic.mn платформоор дамжуулан телемедицин буюу зайнаас эмчийн үзлэгт орох юм. Телемедицин үйлчилгээг нэвтрүүлснээр хөгжлийн бэрхшээлтэй хүүхдүүд эмнэлэгт бус гэртээ, эмчилгээнд бус хайртай хүмүүстэйгээ их цагийг өнгөрөөх боломжтой болохоос гадна яаралтай эмчийн үзлэгийг цаг алдалгүй Монгол Улсын хаанаас ч авах боломж бүрдэнэ.
ТЕЛЕМЕДИЦИН үйлчилгээ буюу зайнаас эмчийн үзлэгт орох энэ үйлчилгээний анхны туршилтыг Баян-Өлгий аймгийн хөгжлийн бэрхшээлтэй хүүхэдтэй эцэг эхчүүдийн холбоонд зохион байгуулав. Хөгжлийн бэрхшээлтэй хүүхэдтэй эцэг эхчүүдийн холбоо”-ны Баян-Өлгий аймаг дахь салбартай ХБХСЗХТ-ийн эмч, мэргэжилтнүүд хамтран тус аймгийн хөгжлийн бэрхшээлтэй 11 хүүхдийг хамрууллаа. Тархины саа, Аутизмын хүрээний эмгэг, Оюуны бэрхшээл, Тулгуур эрхтэний эмгэг, Харааны бэрхшээл гэсэн оноштой хүүхдүүд хамрагдаж, ХБХСЗХТ-ийн сэргээн засахын эмч, хөдөлгөөн засалч, хөдөлмөр засал, хэл засалч, хүүхдийн сэтгэл зүйч, тусгай хэрэгцээт боловсролын багш нар телемедицин үйлчилгээ үзүүллээ.
